30 yoluxan, 56 sağalan var
Azərbaycanda daha 30 nəfər koronavirus infeksiyasına yoluxub. Rəsmi məlumatı aprelin 16-da Nazirlər Kabineti yanında operativ qərargah yayıb.
Yeni hesabata görə, 56 nəfər sağalaraq xəstəxanadan buraxılıb, 1946-cı il və 1961-cı il təvəllüdlü iki xəstə vəfat edib.
Ümumilikdə ölkədə 1283 nəfərin koronavirusa yoluxduğu, onların 460-nın müalicə olunaraq sağaldığı, 15-nin dünyasını dəyişdiyi vurğulanır.
2019-cu ilin dekabrında Çində üzə çıxan, pnevmoniyanın yeni növü olan koronavirus xəstəliyi 210 ölkə və əraziyə yayılıb, 136 mindən çox şəxs ölüb.
Azərbaycanda infeksiyanın yayılmasının qarşısını almaq məqsədilə sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi qadağan olunub, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
Aprelin 5-dən hərəkət məhdudiyyətlərini nəzərdə tutan xüsusi karantin rejimi tətbiq olunur. Vətəndaşların böyük əksəriyyəti yaşayış yerini SMS-lə icazə alıb tərk edə bilər.
Məhdudiyyətlər aprelin 20-dək qüvvədədir.
