49 yeni yoluxma, bir itki
Azərbaycanda koronavirus infeksiyasına daha 49 yoluxma faktı qeydə alınıb, 62 nəfər müalicə olunaraq xəstəxanadan buraxılıb, 1933-cü il təvəllüdlü bir xəstə vəfat edib. Məlumatı aprelin 14-də Nazirlər Kabineti yanında operativ qərargah yayıb.
Rəsmi hesabata görə, ümumilikdə ölkədə 1197 nəfərin koronavirus infeksiyasına yoluxması bilinib, onların 351-i müalicə olunaraq sağalıb, 13-ü dünyasını dəyişib, 833-ü xəstəxanalardadır.
2019-cu ilin dekabrında Çində üzə çıxan, pnevmoniyanın yeni növü olan yoluxucu koronavirus xəstəliyi 210 ölkə və əraziyə yayılıb, 120 mindən çox şəxs ölüb.
Azərbaycanda infeksiyanın yayılmasının qarşısını almaq məqsədilə sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi qadağan olunub, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
