Hasilatın ixtisarı: nöqtə qoyuldu
İri neft ixracatçıları – OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsi (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) aprelin 12-də gündəlik hasilatı mərhələlərlə azaltmaq barədə yekun razılıq əldə ediblər.
Novator.az-ın məlumatına görə, may-iyun aylarında hasilat 2018-ci ilin oktyabr ayı səviyyəsindən 9,7 milyon barrel həcmində azaldılacaq.
Azərbaycan gündəlik neft hasilatını 554 min barrel həcmində saxlamalıdır.
İyul-dekabr aylarında gündəlik neft hasilatının 2018-ci ilin oktyabr ayı səviyyəsindən 8 milyon barrel azaldılması planlaşdırılır. Həmin dövrdə Azərbaycanın gündəlik hasilatı 587 min barrel səviyyəsində olmalıdır.
2021-ci ilin yanvar ayından 2022-ci ilin aprelinədək isə gündəlik neft hasilatının 2018-ci ilin oktyabr ayı səviyyəsindən 6 milyon barrel azaldılması nəzərdə tutulur. Azərbaycan həmin dövrdə hasilatı 620 min barrel həcmində saxlamağa razılıq verib.
Aprelin 9-da əldə edilmiş razılaşma ilkin mərhələdə hasilatın 10 milyon barrel azaldılması şərti yer alırdı. Meksika mayın 1-dən gündəlik hasilatı 400 min barrel deyil, 100 min barrel azaltmaq istədiyi üçün şərtlərə yenidən baxılıb. Bu ölkənin öhdəliyinin digər qismini kompensasiya etmək üçün ABŞ öz hasilatını 300 min barrel azaldacaq.
AZƏRTAC-ın 13 aprel məlumatına əsasən, London birjasında brent markalı neftin barreli 32,67 dollara, Nyu-York birjasında layt markalı neftin barreli 23,72 dollara təklif olunur.
Azərbaycanın 2020-ci il büdcəsində neftin qiyməti 55 dollardan götürülüb. “AzəriLayt” markalı Azərbaycan nefti yanvara 70,04, fevrala 62,15, marta 53,77, aprelə 19,43 dollarla başlayıb.
Mart ayından başlayaraq neft dünyanı bürüyən koronavirus xəstəliyi fonunda kəskin ucuzlaşıb.
