Yeni rəsmi məlumat
Aprelin 12-də yayılan rəsmi məlumata görə, Azərbaycanda daha 40 nəfər koronavirus infeksiyasına yoluxub, 50 nəfər sağalaraq xəstəxanadan buraxılıb.
Nazirlər Kabineti yanında operativ qərargahın hesabatında qeyd olunur ki, indiyədək ölkədə 1098 nəfərin koronavirus infeksiyasına yoluxması üzə çıxıb, onların 250-si müalicə olunaraq sağalıb, 11 nəfər vəfat edib, 837 xəstənin 24-nün vəziyyəti ağırdır.
2019-cu ilin dekabrında Çində üzə çıxan, pnevmoniyanın yeni növü olan yoluxucu koronavirus xəstəliyi 210 ölkə və əraziyə yayılıb, 110 mindən çox şəxs həyatını itirib.
Azərbaycanda infeksiyanın yayılmasının qarşısını almaq məqsədilə sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi qadağan olunub, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
