Neft: yeni qiymətlər, gözləntilər
AZƏRTAC-ın 8 aprel məlumatına görə, London birjasında brent markalı neftin barreli 32,49 dollara, Nyu-York birjasında layt markalı neftin barreli 24,83 dollara satılır.
“AzəriLayt” markalı Azərbaycan neftinin barrelinə 23,97 dollar qiymət qoyulduğu bildirilir.
Azərbaycanın 2020-ci il büdcəsində neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43 dollarla başlayıb.
Mart ayından neft dünyanı bürüyən koronavirus xəstəliyi fonunda ucuzlaşıb. İri neft ixracatçılarını birləşdirən OPEK və bir neçə qeyri-OPEK ölkəsi martın 6-da hasilatı azaltmaq razılığına gələ bilmədiyi üçün qiymətlər daha kəskin enib.
OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və bir neçə qeyri-OPEK ölkəsi (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) hazırda gündəlik hasilatı 10-15 milyon barrel azaltmaq barədə danışıqlar aparır.
Novator.az-ın məlumatına görə, iqtisadçı Rövşən Ağayev özünün “Facebook” səhifəsində yazır ki, neft bazarının başı üzərində yenə qara buludlar sıxlaşıb: “Rusiya və Səudiyyə Ərəbistanı razılığa gələ bilmirlər. Moskva ixtisarın 2020-ci ilin yanvar-mart ayları üzrə orta hasilat göstəricisinə nəzərən qəbul edilməsini istəyir. Səudiyyə Ərəbistanı hazırkı hasilat göstəricisi əsasında qərar verilməsinə tərəfdardır. Bu ölkənin yanvar-mart ayları üzrə gündəlik hasilatı 9,8 milyon barrel olub, hazırda isə 12 milyon barreldir. Bu dəfə də razılaşma alınmasa, neft bazarı yenidən ciddi çökmə yaşayacaq”.
