Aprelin 6-da Milli Televiziya və Radio Şurasının iclası keçirilib.
İclasda İsmət Səttarov şuranın sədri seçilib.
Buna qədər Milli Televiziya və Radio Şurasının sədri Nuşirəvan Məhərrəmli idi. O, 2003-cü ildən şuraya rəhbərlik edirdi.
İsmət Rəcəb oğlu Səttarov 1983-cü ildə Bakıda anadan olub. 160 saylı orta məktəbi, Bakı Dövlət Universitetinin iqtisadi kibernetika və tətbiqi riyaziyyat fakültəsini bitirib.
Texnika elmləri üzrə fəlsəfə doktorudur.
2000-2004-cü illərdə bank sektorunda, 2004-2010-cu illərdə Heydər Əliyev Fondunun analitik-informasiya şöbəsində çalışıb.
2011-ci ildən yeni yaradılmış “Region TV” adlı prodüser qrupunun direktoru vəzifəsini icra edib, 2014-cu ildən həmin prodüser qrupunun əsasında yaradılmış “Region TV” telekanalının direktoru olub.
2016-cı ildən ARB Media Qrupuna rəhbərlik edib, “ARB24” MMC-nin direktoru vəzifəsində çalışıb.
2020-ci il aprelin 4-də dövlət başçısının sərəncamı ilə Milli Televiziya və Radio Şurasının üzvü təyin edilib.
Evlidir, bir övladı var.
Milli Televiziya və Radio Şurası 2002-ci ildə televiziya və radio yayımı sahəsində dövlət siyasətinin həyata keçirilməsini təmin etmək və bu fəaliyyəti tənzimləmək məqsədilə yaradılıb.
Dövlət büdcəsindən maliyyələşdirilən 9 nəfərlik şuranın üzvlərini prezident təyin edir. Üç nəfərin səlahiyyət müddəti 2 il, üç nəfərinki 4 il, üç nəfərinki 6 ildir. Şura üzvləri öz aralarından sədr və sədr müavini seçirlər.
