Koronavirusla bağlı yanlış məlumat yayan 10 nəfər həbs edilib
Koronavirusla bağlı yanlış məlumat yayan 10 nəfər həbs edilib, 18 nəfər cərimələnib. “Amerikanın səsi”nin məlumatına görə, bunu Daxili İşlər Nazirliyinin İctimai Təhlükəsizlik Baş İdarəsinin rəis müavini, polis polkovniki Əziz Baqişev deyib.
Koronavirusla bağlı yanlış məlumat yayan 127 nəfərə isə xəbərdarlıq edilib.
2019-cu ilin dekabrında Çində üzə çıxan, pnevmoniyanın yeni növü olan yoluxucu koronavirus xəstəliyi 200-dən çox ölkə və əraziyə yayılıb, 49 mindən çox şəxs dünyasını dəyişib.
Azərbaycanda 400 nəfərin koronavirus infeksiyasına yoluxduğu bilinib, onların 26-sı sağalıb, 5-i vəfat edib, qalanı müalicə alır.
İnfeksiyanın yayılmasının qarşısını almaq məqsədilə sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, ticarət məkanları (supermarketlər, ərzaq mağazaları və apteklər istisna olmaqla), bir çox məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi qadağan olunub, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
