2019-cu ildə Azərbaycanda stasionar mənbələrdən və avtomobillərdən atmosfer havasına buraxılan çirkləndirici maddələrin həcmi 2018-ci illə müqayisədə 0,9 min ton artaraq 1 milyon 122,1 min ton olub, bunun 84,2 faizi avtomobillərdən buraxılan tullantıların payına düşüb. Hesabatı yayan Dövlət Statistika Komitəsi bildirir ki, stasionar mənbələrdən atılan zərərli tullantıların həcmi sənaye mərkəzlərindən olan Bakıda 6,2 min ton, Sumqayıtda 0,4 min ton, Şirvan şəhərində 0,02 min ton artıb.

Stasionar mənbələrdə yaranan zərərli maddələrin 59,9 faizinin təmizləyici qurğular vasitəsilə zərərsizləşdirildiyi, sənaye müəssisələrində texnoloji proseslərin təkmilləşdirilməsi və mövcud təmizləyici qurğuların səmərəliliyinin artırılması nəticəsində havaya il ərzində 41,9 min ton zərərli maddələrin atılmasının qarşısının alındığı vurğulanır.