Məhkəmə Mübariz Mənsimovun həbsinə qərar verib
Azərbaycanlı iş adamı, “Palmali” Şirkətlər Qrupunun rəhbəri Mübariz Mənsimov Türkiyədə həbs edilib. Qərarı İstanbulda məhkəmə martın 16-da çıxarıb. Novator.az bildirir ki, martın 15-də tutulan Mübariz Mənsimovun istintaqını İstanbul prokurorluğunun terror və mütəşəkkil cinayətkarlıqla mübarizə bürosu aparır.
1968-ci il təvəllüdlü Mübariz Mənsimov gəmi ilə yük daşıyan “Palmali” Şirkətlər Qrupunu 1990-cı illərin sonunda Türkiyədə yaradıb. Şirkətin 20-dən çox ölkədə ofisi var.
4 uşaq atası olan Mübariz Mənsimov xeyriyyəçilik fəaliyyəti ilə tanınır.
Mübariz Mənsimovun ABŞ-da mühacirətdə olan islamçı alim Fətullah Gülənə bağlı çevrə, Türkiyədə FETÖ adı verilmiş terror təşkilatı ilə əlaqələrinin olduğu iddia edilir.
2016-cı il iyulun 15-də bir qrup hərbçi Türkiyədə hakimiyyəti ələ almaq təşəbbüsü göstərib. Yüzlərlə adamın həlak olduğu qiyam yatırılıb. Hakimiyyət çevriliş cəhdinin Fətullah Gülənin planı olduğunu iddia edib. Bu iş üzrə minlərlə şəxs həbs olunub.
