Azərbaycanda koronavirus: 18 nəfər müalicə alır
Nazirlər Kabineti yanında operativ qərargahın 15 mart məlumatına görə, Azərbaycanda koronavirus infeksiyasına daha 6 yoluxma faktı qeydə alınıb. Hazırda 18 nəfər xəstənin xüsusi rejimli tibb ocaqlarında həkim nəzarəti altında olduğu, onların müalicəsinin davam etdiyi bildirilir.
Ötən ilin dekabrında Çində üzə çıxan koronavirus xəstəliyi 130-dan çox ölkəyə yayılıb, 5000 nəfərdən çox şəxs dünyasını dəyişib. Azərbaycanda 25 nəfərin koronavirus infeksiyasına yoluxduğu bilinib, onların 6-sı sağalıb, 1-i vəfat edib.
Martın 14-dən bütün kütləvi tədbirlər təxirə salınıb, kinoteatrların, muzey və teatrların, əyləncə mərkəzlərinin, idman zallarının fəaliyyəti dayandırılıb, toy məclisləri, dəfn istisna olmaqla yas mərasimlərinin keçirilməsi, tibb müəssisələrində müalicə alan şəxslərin ziyarəti qadağan edilib.
Həmin gündən Azərbaycan və Gürcüstan arasında dövlət sərhədi bütün nəqliyyat vasitələri üçün müvəqqəti bağlanıb, martın 15-dən isə Türkiyə və Azərbaycan vətəndaşlarının hava və quru yolu ilə qarşılıqlı səfərləri dayandırılıb.
Azərbaycanın İranla sərhədi fevralın 29-dan bağlıdır.
Nazirlər Kabineti tibbi-profilaktik, dezinfeksiyaedici və digər qabaqlayıcı tədbirlər məqsədilə martın 3-dən bütün təhsil müəssisələrini qapadıb.
Operativ qərargahın məlumatına əsasən, martın 16-dan Bakı-Daşkənd-Bakı; Bakı-Lvov-Bakı; martın 17-dən Bakı-Dubay-Bakı; Bakı-Kazan-Bakı, Bakı-Minvodı-Bakı, Bakı-Ufa-Bakı; Bakı-Doha-Bakı; Abu-Dabi-Bakı-Abu-Dabi, Dubay-Bakı-Dubay, Şarja-Bakı-Şarja; Novosibirsk-Bakı-Novosibirsk; Yekaterinburq-Bakı-Yekaterinburq; Surqut-Bakı-Surqut; martın 18-dən Krasnoyarsk-Bakı-Krasnoyarsk; martın 24-dən Bakı-Nyu-York-Bakı təyyarə reysləri ilə uçuş dayandırılır.
