Dövlət Statistika Komitəsi yeni makroiqtisadi göstəricilər açıqlayıb. Novator.az bildirir ki, rəsmi məlumata görə, 2020-ci ilin yanvar-fevral aylarında ümumi daxili məhsul ötən ilin eyni dövrü ilə müqayisədə 2,8% artaraq 12 milyard 578 milyon manata çatıb.

Adambaşına ümumi daxili məhsul 1263,7 manat göstərilir.

Sənayedə 0,9%, sərmayə qoyuluşunda 12,7%, kənd təsərrüfatında 3,6% yüksəlişin qeydə alındığı vurğulanır.

Açıqlamaya əsasən, ötən ilin ilk iki ayına nəzərən qeyri neft-qaz sənayesi üzrə 21,7%, nəqliyyat sektorunda yük daşınması üzrə 4,1%, sərnişin daşınması üzrə 2,4%, pərakəndə ticarət dövriyyəsi üzrə 3,1%, əhaliyə göstərilən ödənişli xidmətlər üzrə 5%, informasiya və rabitə xidmətləri üzrə 21,1% artım var.

İki ayda dövlət büdcəsinə 3 milyard 613,2 milyon manatın daxil olduğu, büdcədən 3 milyard 330,2 milyon manatın xərcləndiyi, əhalinin nominal gəlirlərinin 8,9% artdığı vurğulanır.

Hesabata görə, yanvar-fevral aylarında 2,8%-lik inflyasiya gedib.

Fevralın 1-nə ölkədə orta aylıq nominal əməkhaqqının 712,1 manata çatdığı qeyd olunur.