Novruz şənlikləri ləğv olundu. Toy və yas tövsiyəsi
Nazirlər Kabineti yanında operativ qərargah martın 10-da rəsmi məlumat yayıb. Qeyd olunur ki, Dünya Səhiyyə Təşkilatı koronavirus xəstəliyinə yoluxma hallarının artmasını, virusun coğrafiyasının genişlənməsini nəzərə alaraq dövlətlərin preventiv tədbirləri gücləndirməsi, eləcə də kütləvi tədbirlərin təxirə salınması təşəbbüsü ilə çıxış edib: “Virusun dünya üzrə əhatə dairəsi genişləndiyindən Azərbaycanda da profilaktik tədbirlər gücləndirilib. Bununla əlaqədar bildiririk ki, Bakı şəhərində və ölkənin müxtəlif regionlarında mart ayında keçirilməli olan Novruz şənlikləri ləğv edilir.
Operativ qərargah ayrı-ayrı qurumları yaxın müddətdə hər hansı kütləvi tədbir keçirməməyə, təyin olunan tədbirlərin tarixini isə dəyişdirməyə çağırır.
Həmçinin adamların sıx toplaşdığı məkanlarda virusa yoluxma riski yüksək olduğundan qarşıdakı aylarda toy və bu cür məclislərin təxirə salınması, yas mərasimlərinin isə kütləvi keçirilməməsi tövsiyə edilir.
Vətəndaşları adamların sıx toplaşdığı yerlərdən, qapalı məkanlardan uzaq durmağa, xarici ölkələrə, eyni zamanda risk qrupu ölkələrinə səfərlərini təxirə salmağa, vacib səfərlər zamanı isə qoruyucu tədbirlərə maksimum riayət etməyə (qoruyucu tibbi maska, xüsusi qoruyucu eynək, dezinfeksiyaedici vasitələrdən istifadə və s.) çağırırıq”.
Novator.az bildirir ki, martın 10-na olan məlumata görə, ötən ilin dekabrında Çində üzə çıxan, pnevmoniyanın bir növü olan koronavirus xəstəliyi daha 114 ölkəyə yayılıb, 115 min 760 nəfər infeksiyaya yoluxub, 4085 şəxs dünyasını dəyişib.
Ölkələr üzrə itki sayı belədir:
Çin – 3136 nəfər
İtaliya – 463 nəfər
İran – 291 nəfər
Cənubi Koreya – 54 nəfər
İspaniya – 31 nəfər
Fransa – 30 nəfər
ABŞ – 27 nəfər
Yaponiya – 10 nəfər
İraq – 7 nəfər
Böyük Britaniya – 5 nəfər
Niderland – 4 nəfər
Avstraliya – 3 nəfər
Honkonq – 3 nəfər
İsveçrə – 3 nəfər
Almaniya – 2 nəfər
San Marino – 2 nəfər
Argentina – 1 nəfər
Filippin – 1 nəfər
Kanada – 1 nəfər
Livan – 1 nəfər
Misir – 1 nəfər
Tailand – 1 nəfər
Tayvan – 1 nəfər.
Daha 7 nəfərin “Diamond Princess” səyahət gəmisində vəfat etdiyi açıqlanıb.
Azərbaycanda koronavirusa 11 yoluxan qeydə alınıb. Yoluxma hallarını müəyyənləşdirmək üçün xəstəxanalar ayrılıb və karantin zonaları yaradılıb, İranla sərhəd sərt rejimə keçib.
Nazirlər Kabineti tibbi-profilaktik, dezinfeksiyaedici və digər qabaqlayıcı tədbirlər məqsədilə martın 3-dən bütün təhsil müəssisələrini qapadıb. İlk tədris günü martın 27-si müəyyən edilib.
