Qafqaz Müsəlmanları İdarəsinin tövsiyələri
Martın 5-də Qafqaz Müsəlmanları İdarəsi koronavirus xəstəliyi ilə bağlı tövsiyələrini açıqlayıb. Dini qurum həkimlərin məsləhətlərinə ciddi riayət olunmasını, məscidlər, ziyarətgahlar, dini tədris müəssisələri və “Quran” kurslarında dezinfeksiya işlərinin aparılması üçün dövlət tibbi-sanitariya müəssisələrinə müraciət edilməsini, namaz zalları, dəstəmazxana, meyitxana və sanitar qovşaqlarının təmizlənməsinə xüsusi diqqət yetirilməsini məsləhət bilir: “Rica edirik uzaq yoldan gələnlər, yaşlı insanlar, eləcə də özündə soyuqdəymə əlamətləri hiss edən xəstə şəxslər namazlarını evlərində qılsınlar, məscidə gələn dindarlar şəxsi təsbehlərindən, canamazlarından, möhürlərindən istifadə etsinlər, mümkün qədər dəstəmazlarını evdə alsınlar. Eyni zamanda məscidə gələn şəxslər bir-biri ilə yaxın təmasdan, əl görüşmələrindən çəkinsinlər.
Qafqaz Müsəlmanları İdarəsi müvəqqəti olaraq məscidlərimizdə moizələrin və birgə ibadətlərin təxirə salınmasını, camaat namazlarının uzadılmadan icra olunmasını, xütbələrin qısaldılmasını tövsiyə edir. İmkan daxilində dindarlarımızın evlərində fərdi qaydada namaz qılmasını, sanitar-epidemioloji vəziyyət imkan vermədiyi təqdirdə məsciddə bütün tədbirlərin, mövlud, şəhadət, ehsan məclislərinin təxirə salınmasını məsləhət görürük”.
Martın 5-nə olan hesabata görə, ötən ilin dekabrında Çində üzə çıxan, pnevmoniyanın bir növü olan koronavirus xəstəliyi daha 85 ölkəyə yayılıb, 96 min 261 nəfər infeksiyaya yoluxub, 3310 şəxs dünyasını dəyişib.
6 nəfərin “Diamond Princess” səyahət gəmisində vəfat etdiyi bildirilir.
Ölkələr üzrə itki sayı isə belədir:
Çin – 3013 nəfər
İran – 107 nəfər
İtaliya – 107 nəfər
Cənubi Koreya – 42 nəfər
ABŞ – 11 nəfər
Yaponiya – 6 nəfər
Fransa – 4 nəfər
İspaniya – 3 nəfər
Avstraliya – 2 nəfər
Honkonq – 2 nəfər
İraq – 2 nəfər
Filippin – 1 nəfər
İsveçrə – 1 nəfər
Tailand – 1 nəfər
Tayvan – 1 nəfər
San Marino – 1 nəfər.
Azərbaycanda da koronavirusa yoluxanlar qeydə alınıb. Nazirlər Kabineti yanında operativ qərargah martın 3-dən bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına qərar verib.
Koronavirus infeksiyasına yoluxma hallarını müəyyənləşdirmək üçün xəstəxanalar ayrılıb və karantin zonaları yaradılıb, İranla sərhəd qapadılıb.
