Arif Hacılı məhbuslara müvəqqəti azadlıq istəyir
Müsavat Partiyasının başqanı Arif Hacılı koronavirus xəstəliyi təhlükəsindən yayınmaq təklifi verib. Novator.az-ın məlumatına görə, 2003-2005 və 2011-2012-ci illərdə həbsdə yatmış siyasətçi özünün “Facebook” səhifəsində yazır ki, cəzaçəkmə müəssisələri koronavirus infeksiyasının yayılması üçün ən təhlükəli yerdir: “14 və 16 saylı cəzaçəkmə müəssisələrində məhbus olarkən soyuqdəymə, qrip xəstəliklərinin daim davam etdiyinin şahidi olmuşam. Özüm fasiləsiz olaraq, aylarla qripli idim. Koronavirus həbsxanalarda yayılsa, ölənlərin sayı rekord həddə çatacaq.
Çıxış yolu var. Həbsxanaların qapılarını açmaq. Məhbusların mühüm qismini müvəqqəti də olsa azadlığa buraxmaq. İranda 54 min məhbus koronavirusa görə müvəqqəti azadlığa buraxılıb. Azərbaycan həbsxanalarının da qapılarını açın, məhbusları azadlığa buraxın!”
Martın 5-nə olan hesabata görə, ötən ilin dekabrında Çində üzə çıxan, pnevmoniyanın bir növü olan koronavirus xəstəliyi daha 83 ölkəyə yayılıb, 95 min 500 nəfər infeksiyaya yoluxub, 3286 şəxs dünyasını dəyişib.
6 nəfərin “Diamond Princess” səyahət gəmisində vəfat etdiyi bildirilir.
Ölkələr üzrə itki sayı isə belədir:
Çin – 3013 nəfər
İtaliya – 107 nəfər
İran – 92 nəfər
Cənubi Koreya – 35 nəfər
ABŞ – 11 nəfər
Yaponiya – 6 nəfər
Fransa – 4 nəfər
Avstraliya – 2 nəfər
Honkonq – 2 nəfər
İraq – 2 nəfər
İspaniya – 2 nəfər
Filippin – 1 nəfər
Tailand – 1 nəfər
Tayvan – 1 nəfər
San Marino – 1 nəfər.
Azərbaycanda da koronavirusa yoluxanlar qeydə alınıb. Nazirlər Kabineti yanında operativ qərargah martın 3-dən bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına qərar verib.
Koronavirus infeksiyasına yoluxma hallarını müəyyənləşdirmək üçün xəstəxanalar ayrılıb və karantin zonaları yaradılıb, İranla sərhəd qapadılıb.
