Tədris ilinin rəsmi təqvimi
Nazirlər Kabineti ümumi təhsil müəssisələrində tədris ilinin müddətini təsdiqləyib. 2020-ci il sentyabrın 15-dən qüvvəyə minəcək sənəd məktəbəhazırlıq qruplarını, habelə ibtidai, ümumi orta və tam orta təhsil ocaqlarını əhatə edir.
Novator.az bildirir ki, təqvimə əsasən, məktəbəhazırlıq qruplarında məşğələlər hər il oktyabrın 1-də başlayır və növbəti il mayın 31-də başa çatır. Tədris ili iki hissəyə bölünür: 1 oktyabr-26 yanvar; 1 fevral-31 may.
İbtidai, ümumi orta və tam orta təhsil müəssisələrində dərs məşğələləri hər il sentyabrın 15-də başlayır və növbəti il iyunun 14-də başa çatır. Tədris ili iki hissədən (15 sentyabr-26 yanvar; 1 fevral-14 iyun) ibarətdir.
Payız tətili 16-20 noyabra; qış tətili 27-31 yanvara düşür.
1-5 may məktəbəhazırlıq qrupları və ibtidai siniflər üçün əlavə tətil müddəti müəyyən edilir.
Sənədə görə, beynəlxalq səviyyədə akkreditasiya olunan təhsil proqramlarının tədrisi üçün fərqli müddətlərin olması mümkündür.
Fövqəladə hadisələr zamanı ölkənin bütün ərazisində tədris ilinin müddətində və tətil günlərində dəyişikliklər Nazirlər Kabinetinin qərarı, bu və ya digər səbəbdən ayrı-ayrı ümumi təhsil müəssisələrində Təhsil Nazirliyinin əmri əsasında həyata keçirilə bilər.
