Övlad götürmək qaydası təsdiqləndi
Fevralın 27-də fərman imzalayan prezident İlham Əliyev valideyn himayəsindən məhrum olmuş uşaqların övladlığa götürülməsi, o cümlədən Azərbaycan vətəndaşı olan uşaqları əcnəbilər və vətəndaşlığı olmayan şəxslərin övladlığa götürməsi qaydasını təsdiqləyib. Fərmana əsasən, Ədliyyə, Daxili İşlər, Səhiyyə və Təhsil nazirlikləri, İcbari Tibbi Sığorta üzrə Dövlət Agentliyi, habelə yerli icra hakimiyyəti orqanları valideyn himayəsindən məhrum olmuş uşaqların vahid uçota alınması məqsədilə onlar haqqında məlumatları Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sisteminin “Valideyn himayəsindən məhrum olmuş uşaqlar və övladlığagötürmə” altsisteminə daxil edəcək səlahiyyətli şəxsləri müəyyənləşdirib onların elektron imza ilə təmin olunmasını təşkil etməlidir. Bu prosesə bir ay vaxt ayrılıb.
Novator.az bildirir ki, qaydaya görə, valideyn himayəsindən məhrum olmuş və övladlığa götürülən uşaqların, habelə onları övladlığa götürməyi arzu edən şəxslərin vahid uçotunun elektron qaydada aparılması, valideyn-namizədlə müsahibə keçirilməsi, onun maddi-məişət şəraitinin müayinəsi, valideyn-namizəd üçün təlimin təşkili, valideyn-namizədə uyğun uşağın və övladlığa götürülən uşağa uyğun valideynin seçilməsi, valideyn-namizədlə uşaqların yerləşdiyi müəssisələrdə görüşlərin təşkili, övladlığa götürülən uşaqların sınaq müddətində valideyn-namizədin evində yerləşdirilməsi, övladlığagötürmənin əsaslandırılması və övladlığa götürülən uşağın mənafeyinə uyğunluğu haqqında rəy verilməsi, övladlığagötürmədən sonrakı monitorinqlərin aparılması, eləcə də övladlığagötürmənin ləğvinin tələb edilməsi Əmək və Əhalinin Sosial Müdafiəsi Nazirliyinin səlahiyyətindədir.
Valideyn himayəsindən məhrum olmuş və övladlığa götürülən uşaqların, habelə valideyn-namizədlərin vahid uçotu bu dövlət orqanlarının (qurumlarının) və təşkilatların informasiya sistemlərindən və ehtiyatlarından istifadə edilməklə elektron qaydada aparılır:
Əmək və Əhalinin Sosial Müdafiəsi Nazirliyi;
Ədliyyə Nazirliyi;
Daxili İşlər Nazirliyi;
Səhiyyə Nazirliyi;
Təhsil Nazirliyi;
İqtisadiyyat Nazirliyi;
Dövlət Miqrasiya Xidməti;
İcbari Tibbi Sığorta üzrə Dövlət Agentliyi;
kredit büroları.
