Dərsliklərin hazırlanma qaydası
Ümumi təhsil müəssisələri üçün dərsliklərin, dərs vəsaitlərinin və digər tədris-metodik vasitələrin hazırlanma qaydası rəsmiləşib. Novator.az bildirir ki, Nazirlər Kabinetinin qərarı ilə təsdiqlənən sənədə əsasən, dərsliklərin, dərs vəsaitlərinin və digər tədris-metodik vasitələrin tərtibi zamanı bu ümumi tələblər nəzərə alınmalıdır: materialların elmi etibarlılığı, dəqiqliyi, inkişaf yönümlülüyü, dəyər yönümlülüyü, tərbiyə yönümlülüyü, şagirdlərin yaş xüsusiyyətlərinə uyğunluğu; pedaqoji və metodiki yanaşmaların qabaqcıl nəzəriyyələrə uyğunluğu; dizayn və tərtibatın məntiqliyi, estetikliyi və müasirliyi; qanunvericiliyin tələblərinə uyğunluğu.
Dərslik 100 ballıq şkala üzrə bu meyarlar əsasında qiymətləndirilir: dərsliyin təhsil proqramına (kurikuluma) uyğunluğu (30 bal); dərsliyə daxil edilmiş materialların elmi etibarlılığı, dəqiqliyi, inkişaf yönümlülüyü, tərbiyə yönümlülüyü, dəyər yönümlülüyü, şagirdlərin yaş xüsusiyyətlərinə uyğunluğu (40 bal); dərslikdə nəzərdə tutulan pedaqoji və metodiki yanaşmaların qabaqcıl nəzəriyyələrə uyğunluğu (20 bal); dizayn və tərtibatın məntiqliyi, estetikliyi və müasirliyi (10 bal).
Dərslik qiymətləndirildiyi hər bir meyar üzrə maksimal balın ən azı 80 faizini toplamalıdır.
Özəl ümumi təhsil müəssisələri üçün dərsliklərin, dərs vəsaitlərinin və digər tədris-metodik vasitələrin nəşri həmin təhsil müəssisələrinin öz vəsaitləri hesabına gerçəkləşir.
Dövlət və bələdiyyə ümumi təhsil müəssisələri üçün dərsliklərin, dərs vəsaitlərinin və digər tədris-metodik vasitələrin nəşri dövlət büdcəsində bu məqsədlə nəzərdə tutulmuş vəsait hesabına, satınalma yolu ilə həyata keçirilir.
Dövlət və bələdiyyə ümumi təhsil müəssisələri üçün kağız dərsliklər, dərs vəsaitləri və digər tədris-metodik vasitələr tədris ilinin başlanmasına 2 ay qalmış nəşr edilir.
