2744+…
Çinin Gigiyena və Səhiyyə Məsələləri Dövlət Komitəsinin 27 fevral hesabatına görə, ölkədə koronavirus xəstəliyindən ölənlərin sayı 2744 nəfərə çatıb.
2019-cu ilin dekabr ayında Çində üzə çıxan bu pnevmoniya xəstəliyi 40-a yaxın ölkəyə də yayılıb. İranda 19, Cənubi Koreyada 13, İtaliyada 12, Yaponiyada 4, Honkonqda 2, Fransada 2, Tayvanda 1, Filippində 1 nəfərin koronavirus qurbanı olduğu vurğulanır.
Novator.az bildirir ki, Səhiyyə Nazirliyi və İcbari Tibbi Sığorta üzrə Dövlət Agentliyinin birgə məlumatına görə, Bakıdakı Kliniki Tibbi Mərkəzin yoluxucu xəstəliklər şöbəsinə həkim müşahidəsi üçün 7 nəfər yerləşdirilib, onların 2-si Azərbaycan, 5-i İran vətəndaşıdır. İrandan yeni gəlmiş 52 nəfər isə Cəlilabad Rayon Mərkəzi Xəstəxanasında müayinədən keçirilir.
Nazirlər Kabinetinin açıqlamasına əsasən, bütün sərhəd-keçid məntəqələrində, o cümlədən hava limanlarında profilaktik tədbirlər görülür, Azərbaycana gələn sərnişinlər ciddi yoxlanır, İranla sərhəd xüsusi rejimdə fəaliyyətə keçib, ölkə ərazisindən tranzit yüklərin daşınması üzərində nəzarət gücləndirilib.
Xüsusi riskli hesab olunan və virusun keçə biləcəyi ərzaq məhsullarına nəzarət artırılıb. Koronavirus üzrə yüksək riskli məhsulların siyahısına isti və soyuqqanlı vəhşi heyvanlar, zoopark heyvanları, vəhşi heyvanların trofeyləri, balıq və balıq məhsulları, dəniz məhsulları, heyvan mənşəli ət məhsulları, ev heyvanları, quş və quş məhsulları daxildir.
İnfeksiya riski olan ölkələrdən Azərbaycana diri heyvanların, balıq və dəniz məhsullarının idxalına müvəqqəti məhdudiyyət qoyulub.
Koronavirusla mübarizədə istifadə olunan bəzi tibbi ləvazimat və preparatların (steril əlcək, baxil, tibbi maska və eynəklər, dezinfeksiyaedici maddə və avadanlıqlar, xüsusi geyimlər və zəruri olan digər tibbi ləvazimat və preparatlar) Azərbaycan ərazisindən aparılması məhdudlaşdırılıb.
