Ekspert Dövlət Neft Fonduna məsləhət verir
İqtisadçı Qubad İbadoğlu kütləvi ölümlərə gətirən koronavirus xəstəliyinin Çin sərhədlərini aşaraq 30-dan çox ölkəyə yayılmasının səhm bazarlarında təlatümlər yaratdığını yazır. Novator.az-ın məlumatına görə, ekspert özünün “Facebook” səhifəsində qeyd edir ki, “Dow Jones” sənaye indeksi fevralın 24-də 3,56 faiz dəyər itirib: “Bu, digər indekslərə, o sıradan Azərbaycanın Dövlət Neft Fondunun (DNF) səhmlərinə neqativ təsir göstərib. DNF-nin səhmlərinə malik olduğu “Standard and Poor’s 100” indeksi 3,35 faiz, “MSCİ Europe ex UK” indeksi 4,11 faiz dəyər itirib. Rusiyanın VTB bankından alınan səhmlər də risk altındadır.
Digər tərəfdən DNF-nin 29,6 milyard dollar məbləğində borc öhdəlikləri və pul bazarları alətləri ABŞ dolları, avro, İngiltərə funt sterlinqi, Avstraliya dolları, Türkiyə lirəsi və Çin yuanında ifadə olunan aktivlərə yatırılıb. Bu portfelin avro, funt sterlinq, lirə və yuanda olan hissəsi məzənnə fərqinə görə dəyərsizləşir.
İlk növbədə Britaniyanın Avropa İttifaqından çıxmasının və koronavirusun təsirləri nəzərə alınaraq valyuta portfeli yeniləşdirilməli, xüsusilə də yuan, lirə, Rusiya rublunda olan aktivlər riskli bazarlardan geri çəkilməli, avronun və funt sterlinqin payı aşağı salınmalıdır”.
