Avropa İnsan Hüquqları Məhkəməsi “Qanun” Nəşrlər Evinin şikayətini araşdırır. Novator.az bildirir ki, məlumatı yayan hüquqşünas Xalid Ağalıyev 2013-cü ildə bu nəşrlər evinə və “Qanun” jurnalının Bakıdakı redaksiyasına vergi işçilərinin reyd etdiyini xatırladır. Reyd zamanı nəşriyyatın mühasibat sənədləri, kompüterlər, bir çox əşya götürülmüş, ardınca 47 min manata yaxın vergi borcu yazılaraq qurumun bank hesabları dondurulmuşdu.

Vergi orqanlarının həmin qərarından şikayətlər yerli məhkəmələrdə təmin etmədiyi üçün “Qanun” Avropa İnsan Hüquqları Məhkəməsinə üz tutub. Hüquqşünas Xalid Ağalıyevin fevralın 25-i özünün “Facebook” səhifəsində yaydığı məlumata görə, Avropa İnsan Hüquqları Məhkəməsi şikayəti araşdırmağa başlayıb. Məhkəmənin Azərbaycan hökumətinə ədalətli məhkəmə araşdırması, şəxsi həyatın toxunulmazlığı, mülkiyyət hüquqlarının pozuntusu iddiaları ilə bağlı aydınlaşdırıcı suallar göndərdiyi vurğulanır.