Ölənlərin sayı 2236 nəfərə çatdı
Çinin Gigiyena və Səhiyyə Məsələləri Dövlət Komitəsi fevralın 21-də yeni hesabat yayıb. Novator.az bildirir ki, rəsmi açıqlamaya görə, ölkədə koronavirus xəstəliyindən ölənlərin sayı 2236 nəfərə çatıb.
Pnevmoniyanın bir növü olan xəstəlik 2019-cu ilin dekabr ayında üzə çıxıb.
Azərbaycanın Nazirlər Kabineti Çindən ölkəyə gələn bütün şəxslərin ciddi tibbi müayinədən keçirilməsi və nəzarət altına alınması, xüsusi riskli hesab olunan və virusun keçə biləcəyi ərzaq məhsullarına nəzarətin gücləndirilməsi barədə qərarlar qəbul edib.
Koronavirus üzrə yüksək riskli məhsulların siyahısına isti və soyuqqanlı vəhşi heyvanlar, zoopark heyvanları, vəhşi heyvanların trofeyləri, balıq və balıq məhsulları, dəniz məhsulları, heyvan mənşəli ət məhsulları, ev heyvanları, quş və quş məhsulları daxildir.
İnfeksiya riski olan ölkələrdən Azərbaycana diri heyvanların, balıq və dəniz məhsullarının idxalına müvəqqəti məhdudiyyət qoyulub.
Koronavirusla mübarizədə istifadə olunan bəzi tibbi ləvazimat və preparatların (steril əlcək, baxil, tibbi maska və eynəklər, dezinfeksiyaedici maddə və avadanlıqlar, xüsusi geyimlər və zəruri olan digər tibbi ləvazimat və preparatlar) Azərbaycan ərazisindən aparılması məhdudlaşdırılıb. Nazirlər Kabinetinin bu qərarı 2020-ci il mayın 1-dək qüvvədədir.
