İxracın 93,4 faizi neft-qazdır
2020-ci ilin ilk xarici ticarət statistikası açıqlanıb. Novator.az bildirir ki, Dövlət Gömrük Komitəsinin rəsmi hesabatına görə, yanvarda Azərbaycanın xarici ticarət əməliyyatlarının həcmi 2 milyard 851,1 milyon dollar olub, 2 milyard 130,2 milyon dollarlıq ixrac, 720,9 milyard dollarlıq idxal qeydə alınıb.
133 ölkə ilə ticarət əməliyyatı aparıldığı, gömrük orqanlarının büdcəyə 333,7 milyon manat ödədiyi vurğulanır.
Statistikaya əsasən, ixracın 6,5 faizi MDB ölkələrinin, 72,3 faizi Avropa İttifaqı ölkələrinin, 21,2 faizi digər ölkələrin payına düşüb.
İdxalda MDB-nin payı 26,4 faiz, Avropa İttifaqının payı 21,6 faiz, digər ölkələrin payı 52 faiz göstərilir.
Yanvarda əsas tərəfdaş İtaliya olub, bu ölkə ilə ticarət dövriyyənin 41 faizi həcmində rəsmiləşib.
İxracda əsas ölkə İtaliya (53,6 faiz), idxalda Rusiyadır (16,2 faiz).
Hesabata görə, ixracın 93,4 faizi neft-qaz sektoruna aiddir.
İdxalın 23,1 faizi maşın, mexanizm, elektrik aparatları, avadanlıqlar və onların hissələri, 13,4 faizi yeyinti məhsulları, 11,7 faizi qara metallar və onlardan hazırlanan məmulatlar, 10,8 faizi nəqliyyat vasitələri və onların hissələri kimi rəsmiləşib.
