Avropa İttifaqı ilə əməkdaşlıq komissiyası yeniləndi
Prezident İlham Əliyev Avropa İttifaqı ilə əməkdaşlıq üzrə dövlət komissiyasının tərkibini yeniləyib. Novator.az-ın məlumatına görə, baş nazirin müavini Şahin Mustafayevin sədrlik etdiyi komissiyaya bu vəzifələri tutan şəxslər üzv olur:
Azərbaycan-Avropa İttifaqı Parlament Əməkdaşlıq Komitəsinin həmsədri
Prezident Administrasiyasının xarici siyasət məsələləri şöbəsinin müdiri; hüquq mühafizə orqanları ilə iş şöbəsinin müdiri; iqtisadi məsələlər və innovativ inkişaf siyasəti şöbəsinin müdiri; qanunvericilik və hüquq siyasəti şöbəsinin müdiri
nəqliyyat, rabitə və yüksək texnologiyalar nazirinin birinci müavini
daxili işlər nazirinin birinci müavini
fövqəladə hallar nazirinin birinci müavini
maliyyə nazirinin birinci müavini
mədəniyyət nazirinin birinci müavini
baş prokurorun birinci müavini
xarici işlər nazirinin müavini
iqtisadiyyat nazirinin müavini
energetika nazirinin müavini
ədliyyə nazirinin müavini
səhiyyə nazirinin müavini
əmək və əhalinin sosial müdafiəsi nazirinin müavini
ekologiya və təbii sərvətlər nazirinin müavini
gənclər və idman nazirinin müavini
təhsil nazirinin müavini
kənd təsərrüfatı nazirinin müavini
Dövlət Gömrük Komitəsinin sədri
Diasporla İş üzrə Dövlət Komitəsinin sədri
Ailə, Qadın və Uşaq Problemləri üzrə Dövlət Komitəsinin sədri
Qaçqınların və Məcburi Köçkünlərin İşləri üzrə Dövlət Komitəsinin sədri
Dini Qurumlarla İş üzrə Dövlət Komitəsinin sədri
Dövlət Statistika Komitəsinin sədrinin birinci müavini
Dövlət Miqrasiya Xidmətinin rəisi
Dövlət Təhlükəsizliyi Xidmətinin rəisinin müavini
Dövlət Sərhəd Xidmətinin rəisinin müavini
Vətəndaşlara Xidmət və Sosial İnnovasiyalar üzrə Dövlət Agentliyinin sədri
Dövlət Turizm Agentliyinin sədri
Qida Təhlükəsizliyi Agentliyinin sədri
Mərkəzi Bank sədrinin müavini
Dövlət Neft Şirkətinin vitse-prezidenti
Azərbaycan Milli Elmlər Akademiyasının birinci vitse-prezidenti
Əqli Mülkiyyət Agentliyinin İdarə Heyətinin sədri
İnsan hüquqları üzrə müvəkkil (ombudsman)
Azərbaycanın Avropa İttifaqı yanında nümayəndəliyinin başçısı
Qeyri-Hökumət Təşkilatlarına Dövlət Dəstəyi Şurasının sədri.
1957-ci ildə yaradılmış Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Azərbaycan Avropa İttifaqının Şərq tərəfdaşlığı proqramının üzvüdür. 2009-cu ildə elan olunmuş proqram Ukrayna, Moldova, Belarus, Gürcüstan və Ermənistanı da əhatə edir.
2018-ci ildə Azərbaycanla Avropa İttifaqı arasında “Tərəfdaşlıq prioritetləri” sənədi imzalanıb. Hazırda strateji tərəfdaşlıq sazişi üzərində iş gedir. Prezident İlham Əliyev ötən il dekabrın 23-də bir qrup yerli telejurnalistə müsahibədə deyib ki, sazişin bəndlərinin mütləq əksəriyyəti razılaşdırılıb, məsələlərin təqribən 90 faizi razılaşma əsasında öz həllini tapıb: “Sazişin bu günə qədər imzalanmamasının səbəbkarı bizik. Bir neçə məsələ hələ ki, müzakirə mövzusudur. Biz təklif olunan məsələlərə öz razılığımızı verməmişik və bunun səbəbi var. Onlardan biri ticarətlə bağlıdır. Azərbaycan Dünya Ticarət Təşkilatının üzvü deyil. Biz bir neçə ölkə ilə müzakirələri ikitərəfli formatda artıq başa vurmuşuq, ancaq mən hesab edirəm ki, hələ vaxt gəlib çatmayıb. Bizim ixracımızın əsas hissəsi hələ ki, neft-qaz məhsullarıdır və bu məhsulları ixrac etmək üçün Dünya Ticarət Təşkilatına üzv olmaq lazım deyil.
Digər tərəfdən bizim əsas vəzifəmiz qeyri-neft sektorunun inkişafıdır, yerli istehsalın artımıdır və belə olan halda biz daxili bazarımızı da qorumalıyıq. Əgər biz indi Dünya Ticarət Təşkilatına üzv olsaq, bizim istehsalçılar sənaye sektorunda, kənd təsərrüfatı sektorunda böyük problemlərlə üzləşə bilərlər. Ola bilsin ki, Azərbaycana keyfiyyətsiz və bizim bazarımızı zəbt etmək məqsədi daşıyan böyük həcmdə idxal məhsulları gələcək və beləliklə, yerli istehsala böyük ziyan vurulacaq.
İmzalanacaq sazişdə ticarətlə bağlı məsələlər bizi qane etmir və biz qarşı tərəfə öz fikirlərimizi bildirmişik. Ümid edirik ki, onlar buna anlayışla münasibət göstərəcəklər.
Sazişdə təklif olunan məsələlərin biri də enerji daşıyıcılarının qiymətləri ilə bağlıdır. Belə bir bənd təklif olunur ki, Azərbaycanda təbii qazın daxili qiyməti ixrac qiyməti ilə bərabərlik təşkil etsin. Azərbaycan istehlakçılarının təxminən 85 faizi təbii qazı çox ucuz qiymətə, yəni dövlətin subsidiyası əsasında alır, qiymət də min kubmetr üçün 100 manatdır. İxrac qiyməti isə bundan bir neçə dəfə böyükdür. Əgər biz öz təbii qazımızı daxili qiymətlərlə satsaq, iqtisadiyyatımıza çox böyük ziyan dəyəcək. Çünki belə olan halda ixrac qiyməti 58 dollar olmalıdır. Bu gün isə dünya bazarlarında, o cümlədən Avropa bazarlarında daxili qiymət, yəni istehlakçıların ödədiyi qiymət təqribən 300, 400, 500 dollara bərabərdir. Bu, təqribən 1000 manata gəlib çıxacaq. Belə olan halda biz daxili qiymətləri ən azı on dəfə qaldırmalıyıq. Azərbaycan vətəndaşları təbii qaz üçün 100 manat yox, 500 manat, ya da 700 manat ödəməli olacaqlar, bu, qətiyyən mümkün deyil.
Ya da biz böyük çətinliklə və böyük səylər göstərərək, böyük investisiyalar qoyaraq Cənub Qaz Dəhlizini demək olar ki, başa çatdıraraq xarici bazarlara öz qazımızı 58 dollara çıxarmalıyıq. Bu, qətiyyən qəbuledilməzdir və təəccüb edirəm ki, nə üçün bizim tərəfdaşlarımız, bu sadə məntiqlə, bu hesablamalarla razılaşa bilmirlər. Ona görə bu iki əsas məsələ razılaşdırılmamış qalır və bizim mövqeyimiz birmənalıdır”.
