Seçkinin rəsmi nəticələrinə etiraz olaraq aksiya keçirilib
Fevralın 10-da Bakının mərkəzində bir qrup şəxs fevralın 9-da keçirilmiş parlament seçkisinin rəsmi nəticələrinə etiraz olaraq aksiya təşkil edib.
Aksiya iştirakçıları “İstefa!” şüarı səsləndirərək yürüşə cəhd ediblər. Lakin əraziyə cəlb olunmuş polis əməkdaşları aksiyanı dayandırmağı tələb edərək, buna imkan verməyiblər. Bir müddət sonra aksiya iştirakçıları ərazidən uzaqlaşdırılıb. Polislər aksiyanın qarşısının alınmasını onun Bakı Şəhər İcra Hakimiyyəti ilə razılaşdırılmaması ilə izah ediblər.
Mərkəzi Seçki Komissiyasının ilkin məlumatına görə, 125 dairə üzrə keçirilmiş parlament seçkisində prezident İlham Əliyevin sədrlik etdiyi Yeni Azərbaycan Partiyasından 72 nəfər deputat seçilir.
Lider namizədlər arasında Vətəndaş Həmrəyliyi Partiyasının 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 təmsilçisi var, 42 nəfər isə partiyasızdır.
