9 partiya azlıqda qalır
Mərkəzi Seçki Komissiyasının ilkin hesabatına əsasən, fevralın 9-da keçirilmiş parlament seçkisində 125 nəfərlik Milli Məclisə 118 nəfər mandat alır. 7 dairədə kimlərin önə çıxdığı bilinmir.
Prezident İlham Əliyevin sədrlik etdiyi Yeni Azərbaycan Partiyasının 66 namizədi öz dairələrində liderlik edir.
Novator.az-ın məlumatına görə, lider namizədlər arasında daha 9 partiyanın təmsilçisi var. Vətəndaş Həmrəyliyi Partiyası 3 mandata sahib çıxır. Qurumun sədri Sabir Rüstəmxanlı 61 saylı Neftçala dairəsindən deputat seçilir. Rafael Hüseynov 58 saylı Hacıqabul-Kürdəmir dairəsində, Fəzail İbrahimli 69 saylı Cəlilabad-Masallı-Biləsuvar dairəsində öndədir.
Digər partiyalı namizədlər bu dairələrdə qalib olur:
16 saylı Yasamal dairəsi – Erkin Qədirli (Respublikaçı Alternativ Partiyası)
22 saylı Nəsimi dairəsi – Asim Mollazadə (Demokratik İslahatlar Partiyası)
26 saylı Sabunçu dairəsi – Fazil Mustafa (Böyük Quruluş Partiyası)
36 saylı Xətai dairəsi – Qüdrət Həsənquliyev (Bütöv Azərbaycan Xalq Cəbhəsi Partiyası)
60 saylı Salyan-Neftçala dairəsi – Fəzail Ağamalı (Ana Vətən Partiyası)
87 saylı Ağsu-İsmayıllı dairəsi – Tahir Kərimli (Vəhdət Partiyası)
88 saylı Göyçay dairəsi – Sabir Hacıyev (Vətəndaş Birliyi Partiyası)
110 saylı Zaqatala dairəsi – Elşən Musayev (Demokratik Maarifçilik Partiyası).
Lider namizədlərin 41-i partiyasızdır.
9 fevral seçkisinə 20 partiya qoşularaq Mərkəzi Seçki Komissiyasına səlahiyyətli nümayəndələr göndərib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Marafonda 1314 deputatlığa namizəd mübarizə aparıb.
