Etibar Əliyevə dəstək
Fevralın 9-da keçiriləcək parlament seçkisinə qatılan namizədlər arasında təhsil sahəsindən də xeyli şəxs var. Onlardan biri təhsil eksperti Etibar Əliyevdir. Etibar Əliyev 31 saylı Suraxanı ikinci seçki dairəsindən deputatlığa namizəddir.
Modern.az tanınmış təhsil ekspertlərinin Etibar Əliyevlə bağlı fikirlərini öyrənib.
Keçmiş deputat, professor Şahlar Əsgərov deyib ki, Yeni Azərbaycan Partiyasının üzvü olsa da, 31 saylı dairədə bitərəf Etibar Əliyevin qalib gəlməsini istəyir: “Etibar mənim tələbəm olub. O, qeyri-standart düşüncəli bir alimdir, kitab sevən adamdır. Mən Azərbaycanda kitaba məhəbbətdə Etibardan qabaqda duran adam tanımıram. Kitab yığan adamdır, böyük kitabxanası var. Öz işığını, ziyasını paylaşan adamdır”.
Gənc alim, Aspirant və Magistrlər Cəmiyyətinin sədri İlqar Orucov deyib ki, Etibar Əliyev təkcə öz dairəsi üçün deyil, Azərbaycan üçün layiqli namizəddir: “Etibar Əliyev ölkədə təhsil problemlərini bilən çox az sayda ekspertlərdən biridir. Uzun illərin dostu kimi onu vicdanlı, dürüst, vətənpərvər, dövlətini sevən bir insan kimi tanıyıram. O, hər zaman təhsilin təəssübkeşi olub, ölkədə oxu mədəniyyətini aşılayan ziyalı olaraq seçilib.
Etibar Əliyev kimi insanların parlamentdə təmsil olunması, seçicilərin ona etimad göstərməsi çox yaxşı olardı. O, parlamentə seçilsə, təkcə 31 saylı Suraxanı dairəsinin deyil, bütövlükdə Azərbaycan xalqının qazanacağı millət vəkili olacaq. Bu baxımdan da mən Etibar müəllimin deputat seçilməsini çox arzu edirəm. Ən əvvəl bir ziyalı olaraq.
“Akademiya” Kitab Mərkəzinin bağlanması ilə bağlı narahatlıqlar zamanı Etibar Əliyev vətənpərvər və milli ziyalı olaraq öz mövqeyini ortaya qoyduğu üçün ona dost, ziyalı kimi mövqeyim formalaşdı. Fikirləşirəm ki, bunu hər kəs etməzdi. Onun bu məsələdə heç bir şəxsi marağı yox idi. Marağı onda idi ki, ölkədə kitab mağazalarının sayı artmalıdır, kitaba, kitab mağazalarına maraq oyanmalıdır.
Etibar Əliyev belə məsələlərdə çəkinmədən hər zaman sözünü demiş, təhsillə bağlı aktual məsələləri hər zaman gündəmə gətirmiş bir şəxsdir. Təhsili bilən insanların parlamentdə olması, əlbəttə, parlamentə uğur gətirər. Əminəm ki, Suraxanının Etibar Əliyevi seçmək imkanı olan insanları bu fürsəti əldən verməyəcəklər”.
Daha bir yazı:
Gələcək naminə Etibar!
