Ermənistan niyə referenduma gedir?
Ermənistan parlamenti ölkədə referendum keçirilməsini nəzərdə tutan qanun qəbul edib. Fevralın 6-da keçirilən səsvermədə sənədi 88 deputat dəstəkləyib.
Böyük əksəriyyəti baş nazir Nikol Paşinyanın Vətəndaş Sazişi Partiyasının üzvü olan “Mənim addımım” bloku 132 deputatdan ibarət parlamentdə 88, Çiçəklənən Ermənistan Partiyası 26, İşıqlı Ermənistan Partiyası 17 mandatla təmsil edilir.
Novator.az-ın məlumatına görə, referendumda ölkənin ana qanununa Konstitusiya Məhkəməsinin tərkibinin buraxılması barədə dəyişiklik edilməsi planlaşdırılır. “Mənim addımım” blokunun ideyası olan yenilik reallaşsa, Konstitusiya Məhkəməsinin ana qanuna 2015-ci ildə edilmiş dəyişikliklərdən öncə təyin olunan 7 üzvünün, o cümlədən sədr Qrayr Tovmasyanın səlahiyyətlərinə xitam veriləcək.
Konstitusiya Məhkəməsi 9 hakimdən ibarətdir. Uzun müddətdir bu qurumla Ermənistan hökuməti arasında ziddiyyətlər yaşanır.
Nikol Paşinyan hakimiyyətə xalq inqilabı dalğasında gəlib. O, 2018-ci il mayın 8-dən baş nazirdir.
