Maliyyə Nazirliyi fevralın 5-də keçirilmiş kollegiya iclasından məlumat yayıb. Xəbərə görə, iclasda bildirilib ki, 2019-cu ildə icmal büdcənin gəlirləri 33,8 milyard manat, xərcləri 26,5 milyard manat həcmində icra olunub, 7,3 milyard manat artıqlıq əldə edilib, dövlət büdcəsində isə 207 milyon manat kəsir yaranıb.

İclasda 2021-ci ilin dövlət və icmal büdcə layihələrinin və sonrakı üç il üçün icmal büdcə göstəricilərinin hazırlanması ilə bağlı 39 bənddən ibarət tədbirlər planı təsdiqlənib.

Maliyyə naziri postunu Samir Şərifov tutur. 1961-ci il təvəllüdlü Samir Şərifov Kiyev Dövlət Universitetinin beynəlxalq əlaqələr və beynəlxalq hüquq fakültəsinin beynəlxalq iqtisadi əlaqələr bölməsini bitirib.

1983-1991-ci illərdə SSRİ-nin xarici iqtisadi əlaqələr sistemində (Bakıda və Yəmən Xalq Demokratik Respublikasında) iqtisadçı kimi çalışıb.

1991-ci ildən 1995-ci ilədək Azərbaycan Xarici İşlər Nazirliyinin beynəlxalq iqtisadi əlaqələr idarəsində şöbə müdiri, idarə rəisinin müavini işləyib.

1995-2001-ci illərdə Azərbaycan Milli Bankında departament direktoru, baş direktor, 2001-2006-cı illərdə Dövlət Neft Fondunda icraçı direktor olub, 2006-cı ilin aprelində maliyyə naziri təyin edilib.