Ukrayna parlamenti – Ali Rada fevralın 4-də ölkə konstitusiyasına dəyişiklik layihəsini ilk oxunuşda qəbul edib. Novator.az-ın məlumatına görə, prezident Vladimir Zelenskinin təşəbbüsü olan layihə Ali Rada deputatlarının sayının 300-ə endirilməsini və parlament seçkisinin proporsional sistemlə (partiya siyahıları üzrə) keçirilməsini nəzərdə tutur.

Layihəyə əsasən, son 5 ildə Ukraynada daimi yaşayan və dövlət dilini bilən şəxs deputatlığa namizəd ola bilər.

Hazırda 450 nəfərlik Ali Radanın deputatlarının yarısı majoritar sistemlə (dairələrdən), yarısı proporsional sistemlə seçilir.

Konstitusiyaya yeniliyin baş tutması üçün onu 300 deputatın dəstəkləməsi tələb olunur. İlk oxunuşda layihəyə 236 deputat səs verib.

Ötən il iyulun 21-də seçilmiş indiki parlamentdə prezident Vladimir Zelenskini dəstəkləyən Xalq Xidmətçisi Partiyası 257 mandatla təmsil olunur.

Əsas fraksiyalardan Müxalif Platforma Partiyasının Ali Radada 44, Avropa Həmrəyliyi Partiyasının 27, Batkivşina Partiyasının 24, Səs Partiyasının 20 mandatı var.

Ukrayna Konstitusiyasına əsasən, hökuməti parlamentdə azı 226 mandatı olan siyasi qüvvə qurur.