Yeni müşahidə missiyası
ATƏT-in Parlament Assambleyası Azərbaycanda fevralın 9-da keçiriləcək parlament seçkisini monitorinq etməyə 60-dan çox müşahidəçinin daxil olduğu nümayəndə heyəti göndərmək qərarı çıxarıb. Xəbəri yayan “Basta” saytı onu da bildirir ki, ATƏT-in Demokratik Təsisatlar və İnsan Haqları Bürosunu 9 fevral seçkisində 350 müşahidəçi təmsil edəcək.
125 dairədə keçiriləcək 9 fevral seçkisinə 20 partiya qoşularaq Mərkəzi Seçki Komissiyasına səlahiyyətli nümayəndələr göndərib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Parlament seçkisində mübarizə aparan namizədlərin sayı 1324 göstərilir.
Yanvarın 17-də başlanan təşviqat fevralın 8-də bitəcək.
Qanuna görə, seçkidə qələbə üçün nisbi səs çoxluğu tələb olunur.
