Davosda yeni görüşlər
Prezident İlham Əliyev yanvarın 23-ü İsveçrənin Davos şəhərində “Swiss Re” şirkətinin ictimaiyyətlə əlaqələr üzrə sədri Veronika Skotti ilə görüşüb. AZƏRTAC-ın məlumatına görə, Veronika Skotti son illərdəki islahatlar nəticəsində Azərbaycanda sığorta sahəsinin inkişafı və təkmilləşməsi üçün yaxşı imkanların yarandığını vurğulayıb, qeyd edib ki, “Swiss Re” şirkəti islahatlarda iştiraka, Azərbaycanda sığorta bazarının daha da inkişafına töhfə verməyə hazırdır.
“Swiss Re”nin əsasən fövqəladə hallarda yaranan sığorta hadisələri və onların təkrar sığortası üzrə ixtisaslaşmış lider şirkətlərdən olduğunu deyən Veronika Skotti təmsil etdiyi qurumun müxtəlif ölkələrdə həyata keçirdiyi layihələr barədə məlumat verib.
Dövlət başçısı Azərbaycanda sığorta bazarının, xüsusilə daşınmaz əmlak sahəsində sığorta sisteminin səmərəli təşkilinin və inkişafının vacib olduğunu deyib, bu sahədə beynəlxalq təcrübənin tətbiqini sürətləndirəcək xarici investorlarla, o cümlədən “Swiss Re” şirkəti ilə əməkdaşlıq barədə fikir mübadiləsi aparıb.
İlham Əliyev həmin gün “Procter and Gamble Europe” şirkətinin prezidenti Loik Tassel ilə də bir araya gəlib. Loik Tassel Azərbaycandakı islahatları, xüsusilə biznes sahəsində mühasibatlılığın və şəffaflığın artırılması, vergi və gömrük sahələrində islahatların ümumi rəqabət mühitinə verdiyi müsbət töhfəni yüksək qiymətləndirib. Azərbaycanın biznes mühitinin bütün xarici investorların öz fəaliyyətlərini genişləndirmələri üçün çox əlverişli imkan yaratdığını deyən Loik Tassel rəhbəri olduğu şirkətin ölkədəki biznes və sosial fəaliyyəti barədə danışıb.
Söhbət zamanı bildirilib ki, “Procter and Gamble Europe” şirkəti fəaliyyətini Orta Asiya və Uzaq Şərqə doğru genişləndirmək niyyətindədir və regional mərkəz olaraq məhz Bakı şəhəri seçilib.
