Yunanıstan: qadının prezidentlik siftəsi
Yunanıstan parlamenti yanvarın 22-də baş nazir Kiriakos Mitsotakisin təqdimatını nəzərə alaraq Ali İnzibati Məhkəmənin – Dövlət Şurasının sədri Yekaterina Sakellaropulunu ölkə prezidenti seçib. O, Yunanıstanda dövlət başçısı kürsüsünə oturan ilk qadın olacaq.
Novator.az bildirir ki, Yunanıstan Konstitusiyasına görə, prezidentin səlahiyyət müddəti 5 ildir. İndiki prezident Prokopis Pavlopulos postunu martın 13-də təhvil verəcək.
Yekaterina Sakellaropulu 1956-cı ildə Saloniki şəhərində doğulub. Afina Universitetinin hüquq fakültəsini bitirib.
Dövlət Şurasına 2018-ci ildən sədrlik edir.
Yunanıstanda ötən il iyulun 7-də keçirilmiş növbədənkənar parlament seçkisini Yeni Demokratiya Partiyası udaraq hökumət qurub. Bu partiyaya Kiriakos Mitsotakis liderlik edir.
Səidə Hüseynova
