Azərbaycanda 15 və yuxarı yaşlı əhalinin hər 1000 nəfərindən 972-nin ali, orta ixtisas və orta təhsili var. Novator.az-ın məlumatına görə, hesabatı yayan Dövlət Statistika Komitəsi bildirir ki, 2020-ci il yanvarın 1-nə 1679 dövlət və 124 qeyri-dövlət məktəbəqədər təhsil müəssisəsində 126 mindən çox uşaq tərbiyə alıb.
2019-2020-ci tədris ilinin əvvəlinə 4400 dövlət və 33 qeyri-dövlət ümumi təhsil müəssisəsində 1,6 milyon şagirdin olduğu vurğulanır.
Hesabata əsasən, 2019-2020-ci tədris ilinin əvvəlinə ölkədə fəaliyyət göstərən 58 orta ixtisas təhsil müəssisəsində 56 min tələbə oxuyub.
40 dövlət və 12 qeyri-dövlət ali təhsil müəssisəsində, eləcə də 27 elmi təşkilatda təhsil alanların sayı 187,7 min nəfər göstərilir.
İlkin məlumatlara əsasən, 2020-ci ilin əvvəlinə ölkədə müxtəlif elmi-texniki xidmətləri həyata keçirən 133 elmi təşkilat və müəssisədə elmi-tədqiqat və işləmələrlə məşğul olan mütəxəssislərin 37,4 faizinin elmlər doktoru və ya fəlsəfə doktoru elmi dərəcəsi var.
Milli Elmlər Akademiyasının 68 həqiqi və 105 müxbir üzvünün olduğu bildirilir.
