Namizədlərin siyahısı
Mərkəzi Seçki Komissiyası fevralın 9-na təyin edilmiş parlament seçkisinin rəsmi namizədlərinin siyahısını dərc edib. Hesabata görə, marafona 2431 nəfər qatılıb, onların 1560-nın deputatlığa namizədliyi qeydə alınıb.
125 dairədə keçiriləcək 9 fevral seçkisinə 20 partiya qoşularaq Mərkəzi Seçki Komissiyasına səlahiyyətli nümayəndələr göndərib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Növbəti parlament seçkisi bu il noyabrın 1-də keçirilməli idi. Ötən il dekabrın 5-də prezident İlham Əliyev Milli Məclisi buraxaraq növbədənkənar parlament seçkisi təyin edib.
Təşviqat yanvarın 17-də başlanıb.
Təqvim planına əsasən, səsvermənin nəticələri haqqında ilkin məlumat seçki günü verilir, seçki dairəsi üzrə nəticələrin müəyyən olunması, protokolun ona əlavə edilmiş sənədlərlə birlikdə Mərkəzi Seçki Komissiyasına təqdim olunması fevralın 12-dək bitir.
Mərkəzi Seçki Komissiyası fevralın 29-dək Milli Məclisə seçkiyə yekun vurub sənədləri Konstitusiya Məhkəməsinə göndərməlidir.
