Yaşamaq düsturu
Fiziki fəallıq daxil olmaqla faydalı vərdişlər və sağlam qidalanma adamın ömrünü 10 ilə qədər uzada bilər. Novator.az-ın məlumatına görə, Harvard Universitetinin (ABŞ) və Amsterdam Tətbiqi Elmlər Universitetinin (Niderland) alimləri xüsusi araşdırmada bu qənaətə gəliblər.
Alimlər araşdırmaya 50 yaşı olan yüz mindən çox adamı cəlb ediblər. Tədqiqat başlayanda heç bir xəstəliyi olmayan həmin adamların səhhəti 20 ildən artıq müddətə nəzarətə götürülüb, kimin ürək-damar, xərçəng və ya ikinci dərəcəli diabet xəstəliyinə hansı yaşda tutulduğu və nə qədər yaşadığı qeydə alınıb.
Ekspertlər 5 əsas risk amilini müəyyən ediblər: siqaret çəkmək, gündə orta dozada alkoqol qəbul etmək (qadınlar üçün 175 qram şərab və ya 375 qram pivə, kişilər üçün 350 qram şərab və ya 750 qram pivə), zərərli qida, fiziki tənbəllik və artıq çəki.
Müəyyən olunub ki, sağlam qidalanan, fiziki cəhətdən fəal, siqaretdən və spirtli içkidən tam imtina edən, habelə çəkisini normada saxlaya bilən qadınlar orta hesabla 84,4 il, kişilər 81,1 ilə qədər yaşayır.
Faydalı vərdişləri olmayan qadınların 73,7 il, kişilərin 73,5 il yaşaya bildiyi üzə çıxıb.
Səidə Hüseynova
