Tapşırıq barədə tapşırıq
2019-cu il martın 1-də mədəniyyət və incəsənət xadimlərinin prezident İlham Əliyevlə görüşündə çıxış edən Azərbaycan Memarlar İttifaqı İdarə Heyətinin sədri Elbay Qasımzadə paytaxt Bakıda yeni rayon yaradılması təklifi vermişdi: “Bakının tarixi mərkəzi var. Mütləq bunun sərhədləri müəyyənləşməlidir. Bu gün Bakının tarixi mərkəzi Səbail, Yasamal, Nəsimi və Nərimanov rayonları arasında bölünüb. Nə qədər bunlara mərkəzdən rəhbərlik olunsa da, dörd rəhbərin, dörd komandanın hərəsinin bu işə baxışı müxtəlifdir. Mən təklif edirəm o sərhədlər müəyyənləşsin və Bakının tarixi mərkəzi əsasında xüsusi ərazi vahidi yaransın. Bunu etsək, orada tətbiq olunan qanunlar, normalar başqa yerlərdən fərqlənəcək. Yeni Yasamalla Bakının tarixi mərkəzində tələblər eyni ola bilməz”.
Dövlət başçısı təklifi dəstəkləyərək qeyd etmişdi ki, şəhərin mərkəzinin hüdudları dəqiq müəyyən olunarsa, vahid idarəetmə sistemi də yaradıla bilər.
Novator.az-ın məlumatına görə, bu il yanvarın 8-də Dövlət Şəhərsalma və Arxitektura Komitəsinin sədri təyin etdiyi Anar Quliyevlə görüşən prezident İlham Əliyev həmin məsələyə toxunub: “Bir müddət bundan öncə ziyalılarla görüşdə Memarlar İttifaqının sədri təklif vermişdi ki, Bakının mərkəzi rayonu formalaşsın. Mən Bakı Şəhər İcra Hakimiyyətinə müvafiq göstərişlər vermişəm. Sizə də tapşırıram, Bakı Şəhər İcra Hakimiyyəti, Memarlar İttifaqı yığışın birlikdə təklifləri konkretləşdirin. Çünki bunun üstündən artıq uzun müddət keçib, ancaq hələ ki, mənə heç bir təklif verilməyib. Mən prinsip etibarilə bu təklifi dəstəkləyirəm. Çünki belə olan halda mərkəzi rayonda bu rayona uyğun xüsusi mühafizə tədbirləri görülə bilər və memarlıq abidələrimizə diqqət daha da yüksək ola bilər”.
