Könüllülər ili elan olundu
2020-ci il Azərbaycanda könüllülər ili elan edilib. Prezident İlham Əliyevin 30 dekabr 2019-cu il sərəncamında qeyd olunur ki, Azərbaycan xalqı əsrlər boyu xeyirxahlıq, fədakarlıq, könüllü və təmənnasız kömək ənənələrini yaşadıb: “Könüllülük insanları vahid niyyət ətrafında birləşdirən, vətəndaş, cəmiyyət və dövlətin birgə fəaliyyətinin ən uğurlu formatı, vətənpərvərlik məktəbi, öz xalqına, dövlətinə, milli-mənəvi dəyərlərə bağlılıq və xidmət örnəyidir.
Bu fəaliyyətin təşviqi məqsədilə dövlət zəruri addımlar atıb, normativ hüquqi baza təkmilləşdirilib, dövlət dəstəyi mexanizmləri formalaşdırılıb. Könüllülük bir çox fəaliyyət sahələrinə nüfuz edərək ümummilli hərəkata çevrilib, ölkəmizin hər bir bölgəsinə, ictimai həyatın müxtəlif sahələrinə yayılaraq cəmiyyətimizin bütün təbəqələrini əhatə edib, gənclərimizin həyat tərzinə çevrilib”.
Dövlət başçısı Nazirlər Kabinetinə 2020-ci ilin könüllülər ili elan edilməsinə dair tədbirlər planını bir ay müddətində hazırlamağı tapşırıb.
Novator.az qeyd edir ki, prezident sərəncamları ilə 2007-ci il gənclər ili, 2009-cu il uşaq ili, 2010-cu il ekologiya ili, 2011-ci il turizm ili, 2012-ci il idman ili, 2013-cü il informasiya-kommunikasiya texnologiyaları ili, 2014-cü il sənaye ili, 2015-ci il kənd təsərrüfatı ili, 2016-cı il multikulturalizm ili, 2017-ci il islam həmrəyliyi ili, 2018-ci il Azərbaycan Xalq Cümhuriyyəti ili, 2019-cu ili Nəsimi ili elan edilmişdi.
