Baş redaktor nazirliyə qarşı: bir instansiyada proses yekunlaşdı
Arqument.az saytının baş redaktoru Şəmşad Ağanın iddiası ilə 1 saylı Bakı İnzibati-İqtisadi Məhkəməsində başlanan məhkəmə prosesi yekunlaşıb.
Şəmşad Ağa Toplum.tv-yə bildirib ki, məhkəmə onun iddiasını təmin etməyib.
Dörd ay çəkən məhkəmə prosesi dekabrın 24-də sona çatıb.
Baş redaktor qeyd edib ki, məhkəmənin qərarından apellyasiya şikayəti verəcək.
Şəmşad Ağanın iddiası Nəqliyyat, Rabitə və Yüksək Texnologiyalar Nazirliyinə qarşıdır. İddiaya səbəb bu ilin aprelində heç bir xəbərdarlıq edilmədən üç gün ərzində Arqument.az saytına girişə məhdudiyyət qoyulmasıdır.
Şəmşad Ağa sayta müdaxilənin Cəlilabadda bir qrup fermerin etiraz aksiyası haqda xəbərlə bağlı olduğunu düşünür. Onun sözlərinə görə, həmin aksiya barədə ilk məlumatı Arqument.az yayıb.
Baş redaktor bildirir ki, sayt bloklanandan sonra redaksiyadan materialları silmək tələb olunub, lakin onlar bu təklifdən imtina ediblər. Üç gün sonra saytın fəaliyyəti bərpa olunsa da, bloklanma müddətində saytın məlumat bazasına edilən haker hücumları nəticəsində bəzi materiallar və məlumat bazası zədələnib.
Şəmşad Ağa bunu ifadə azadlığına zidd sayır və fəaliyyətlərinə qanunsuz müdaxilə hesab edir.
2017-ci il martın 17-də “İnformasiya, informasiyalaşdırma və informasiyanın mühafizəsi haqqında” qanuna dəyişikliklər təsdiqlənib, nəticədə Rabitə və Yüksək Texnologiyalar Nazirliyi saytlara girişi məhdudlaşdırmaq səlahiyyəti qazanıb.
2018-ci il avqustun 8-də Səbail Rayon Məhkəməsi nəqliyyat, rabitə və yüksək texnologiyalar nazirinin iddiası əsasında Arqument.az saytını bloklamışdı. Avqustun 10-da Bakı Apellyasiya Məhkəməsi Səbail məhkəməsinin qərarını ləğv etmişdi. Həmin vaxt bu, sayt üzərinə qoyulan blokun ləğvi istiqamətində Azərbaycan məhkəmələrində çıxarılan ilk qərar idi.
Arqument.az saytı 2014-cü ildən fəaliyyət göstərir.
