Mərkəzi Seçki Komissiyasının səhər saat 10-a olan hesabatına görə, 23 dekabr bələdiyyə seçkilərinə seçicilərin 8,51 faizi qatılıb. Ümumilikdə 4 milyon 972 min 356 nəfərin səsvermə hüququ var.

Prezident İlham Əliyev və birinci vitse-prezident Mehriban Əliyeva Bakıda, 29 saylı Səbail seçki dairəsinin 6-cı məntəqəsində səs veriblər.

118 dairəni, 5049 məntəqəni əhatə edən seçkilərdə 1606 bələdiyyəyə 15156 nəfər seçilməlidir.

Seçkilərə Yeni Azərbaycan Partiyası, Demokratik İslahatlar Partiyası, Böyük Quruluş Partiyası, Vətəndaş Birliyi Partiyası, Bütöv Azərbaycan Xalq Cəbhəsi Partiyası, Milli Dirçəliş Hərəkatı Partiyası, Demokratik Maarifçilik Partiyası, Sosial Demokrat Partiyası, Ümid Partiyası, Ana Vətən Partiyası, Vətəndaş Həmrəyliyi Partiyası, Vəhdət Partiyası, Respublikaçılar Partiyasının təmsilçiləri, həmçinin partiyasız şəxslər qoşulublar.

Seçicilərin ən çox səsini toplayan namizədlər bələdiyyə üzvlərinin sayına bərabər olaraq müvafiq bələdiyyəyə üzv seçilmiş hesab ediləcək.

Mərkəzi Seçki Komissiyası ən geci 25 gün müddətində bələdiyyə seçkilərinin yekunlarını elan etməlidir.