Mustafa seçkidən kənarda qalır?
Müsavat Divanının üzvü, partiyanın Mətbuat və İnformasiya Departamentinin rəhbəri Mustafa Hacıbəylinin məhkəməyə müraciəti üzrə qərar dekabrın 24-də çıxarıla bilər.
Novator.az bildirir ki, Mustafa Hacıbəyli 1992-ci ildən Müsavat Partiyasının üzvüdür. “Basta” saytının baş redaktorudur.
2018-ci il iyulun 3-də Rusiya vətəndaşı Yunis Səfərov Gəncədə icra hakimiyyətinin başçısını odlu silahla öldürməyə cəhd göstərib. Hadisə zamanı başçı və bir polis əməkdaşı yaralanıb. Baş Prokurorluq həmin il iyulun 8-də açıqlama yayaraq qeyd edib ki, bəzi kütləvi informasiya vasitələri Gəncədəki terror aktı ilə əlaqədar həqiqətə uyğun olmayan təxribat xarakterli məlumatlar yayıb. İddiaya əsasən, həmin məlumatlarda terrorçuluğa və hakimiyyətin zorla ələ keçirilməsinə və Azərbaycan Respublikasının konstitusiya quruluşunun zorla dəyişdirilməsinə yönələn açıq çağırışlar edilib.
Açıqlamada “Basta” saytının da adı hallanıb. Sayt bloklanıb, baş redaktor Mustafa Hacıbəyli Bakı Şəhər Prokurorluğunun bir neçə media orqanına qarşı qaldırdığı cinayət işinə cəlb olunub.
Bakı Ağır Cinayətlər Məhkəməsi bu il fevralın 21-də Mustafa Hacıbəylini vəzifə səlahiyyətlərini aşma, vəzifə saxtakarlığı və dövlət əleyhinə çağırışlarda təqsirli bilərək 5 il 6 ay müddətinə azadlıqdan şərti məhrum edib. Cəzanın 2 ili sınaq müddətidir.
Müsavat Partiyası 2020-ci il fevralın 9-da keçiriləcək növbədənkənar parlament seçkisində Mustafa Hacıbəylini 31 saylı Suraxanı seçki dairəsindən namizəd göstərib. Məhkumluğu olan şəxsin seçkiyə qatılması yasaqdır. Buna görə Mustafa Hacıbəyli Binəqədi Rayon Məhkəməsinə müraciət edərək məhkumluğunun götürülməsini istəyib. Dekabrın 19-da keçirilən prosesdə çıxış edən Mustafa Hacıbəyli deyib ki, “Basta” saytında dərc edilən iki məqaləyə görə barəsində çıxarılan məhkəmə hökmü qanunsuzdur: “Mənim ifadə azadlığım, hərəkət azadlığım sifarişli hökmlə məhdudlaşıb. İndi qarşıdan seçki gəlir, üzərimdə məhkumluq olduğu üçün deputatlığa namizədliyimi irəli sürə bilmirəm. Seçki hüququmun məhdudlaşmasını aradan qaldırmaq üçün məhkəməyə üz tutmuşam”.
Prosesdə Binəqədi Rayon İcra və Probasiya Şöbəsinin məhkəmə sorğusuna cavabı elan edilib. Cavabda qeyd olunur ki, 2 illik sınaq müddətinin yarısı keçmədiyi üçün məhkumluğun götürülməsi barədə qərar qəbul edilə bilməz.
Cinayət Məcəlləsinə görə, şərti məhkum edilmiş şəxs sınaq müddətinin azı yarısı keçdikdən sonra öz davranışı ilə islah olunduğunu sübut edərsə, məhkəmə məhkumun üzərində nəzarəti həyata keçirən dövlət orqanının təqdimatı əsasında şərti məhkum etmənin ləğvi və məhkumluğun götürülməsi barədə qərar qəbul edə bilər.
Dövlət ittihamçısı çıxış üçün 5 gün vaxt istədiyi üçün məhkəmə dekabrın 24-nə saxlanıb.
1972-ci il təvəllüdlü Mustafa Hacıbəyli Qarabağ müharibəsi veteranı, III qrup əlildir. İndiki Dövlət İdarəçilik Akademiyasını bitirib, Şərqi Avropada Demokratiyanın İnkişafı İnstitutunun layihəsi əsasında Polşada jurnalistika sahəsi üzrə ixtisaslaşıb. “525-ci qəzet”də, “Yeni Müsavat” qəzetində çalışıb, “Demokrat” qəzetinin baş redaktoru olub. “Basta” saytını 2015-ci ildə yaradıb.
Mustafa Hacıbəylinin işi məhkəməyə gedir
Mustafa Hacıbəyli nəzarətə götürüldü
Mustafa Hacıbəylinin məhkəməsi başlayır
Mustafa Hacıbəylinin məhkəməsi: vəsatət təmin olunmadı
Baş redaktorun məhkəməsi: jurnalistlər ifadə veriblər
Baş redaktorun məhkəməsi davam edir
Mustafa Hacıbəyliyə hökm oxundu
Mustafa Hacıbəyliyə bəraət verilmədi
Baş redaktor beynəlxalq tədbirə buraxılmayıb
