Eldar Namazov Youtube.com-da EN TV kanalı açıb.

Novator.az-ın məlumatına görə, tamaşaçılara müraciətində Eldar Namazov deyib ki, kanalın məqsədi Azərbaycanın tarixi, Qarabağ münaqişəsi, ölkənin sabahı ilə bağlı müzakirələrin təşkilidir: “Verilişlərimizin bir qismi rusca və ingiliscə olacaq. Çünki xüsusilə işğal olunmuş ərazilərimizlə, Qarabağ məsələsi ilə bağlı bizə qarşı müəyyən kampaniyalar aparılır. O kampaniyalara cavab vermək, tariximiz, Qarabağ problemi haqda həqiqətləri, digər məsələləri dünya ictimaiyyətinə çatdırmaq üçün rusca və ingiliscə materiallar hazırlayıb təqdim edəcəyik”.

Eldar Namazov 1956-cı ildə doğulub. İndiki Azərbaycan Dövlət Pedaqoji Universitetini bitirib. Tarix elmlər namizədidir.

1981-1985-ci illərdə Moskva Etnoqrafiya və Antropologiya İnstitutunda çalışıb. 1985-1991-ci illərdə Azərbaycan Elmlər Akademiyasının Tarix İnstitutunda müdir müavini və müdir vəzifələrini tutub.

1991-1993-cü illərdə Strateji və Beynəlxalq Araşdırmalar Mərkəzinin rəhbəri olub.

1993-1999-cu illərdə Azərbaycan prezidentinin (Heydər Əliyevin) köməkçisi vəzifəsini tutub, bir müddət Prezident Katibliyinə rəhbərlik edib.

2001-ci ildən Azərbaycan Naminə İctimai Forumun prezidentidir.