Demokratiyaya doğru: Özbəkistan lider sayıldı
Böyük Britaniyanın “The Economist” jurnalı Özbəkistanı 2019-cu ilin ölkəsi seçib. Ənənəvi mükafat demokratiya sahəsində tərəqqi meyarına əsaslanır. Media qurumunun ekspertləri bəyan edib ki, Özbəkistan 2019-cu ildə demokratiyaya doğru ciddi addımlar atmaqla despotizmi qismən cilovlayıb.
“The Economist” 2018-ci ildə dinc inqilabın yaşandığı Ermənistanı ilin ölkəsi seçmişdi.
Novator.az bildirir ki, 1989-cu ildən Özbəkistana İslam Kərimov rəhbərlik edib. O, SSRİ vaxtı, 1989-cu ilin iyun ayının 23-də Kommunist Partiyası Mərkəzi Komitəsinin birinci katibi seçiləndən Özbəkistanın başında dayanıb. 1990-cı il martın 24-də parlamentin qərarı ilə prezident vəzifəsinə gətirilən İslam Kərimov 1991-ci ildə Özbəkistan müstəqillik əldə etdikdən sonra beş dəfə dövlət başçısı seçilib, 2016-cı il sentyabrın 2-də dünyasını dəyişib.
2016-cı il dekabrın 4-də keçirilmiş növbədənkənar prezident seçkisində Şövkət Mirziyayev dövlət başçısı seçilib, dekabrın 14-də and içərək səlahiyyətlərinin icrasına başlayıb.
Şövkət Mirziyayev Daşkənd İrriqasiya və Meliorasiya İnstitutunu bitirib. Həmin institutda elmi işçi, komsomol təşkilatının katibi, partiya təşkilatının rəhbəri, 1-ci prorektor vəzifələrində çalışıb.
1990-cı ildə Özbəkistan Ali Sovetinin, 1994 və 1999-cu illərdə Ali Məclisin deputatı seçilib. Daşkəndin Mirzə-Uluqbəy rayonunun, Cizak vilayətinin, Səmərqənd vilayətinin icra hakimi olub. 2003-cı il dekabrın 12-dən baş nazir postunu tutub.
