2020-ci ildə maaşdan nələr tutulacaq?
2020-ci ildə əmək müqaviləsi və ya mülki-hüquqi müqavilələrlə işləyən vətəndaşların əməkhaqqından tutulmalar necə yenilənir? Hüquqşünas Şəhriyar Həbilov Vergiler.az-da yaydığı şərhdə qeyd edir ki, maaşdan bu tutulmalar olacaq: gəlir vergisi; məcburi dövlət sosial sığorta haqqı; işsizlikdən sığorta haqqı; icbari tibbi sığorta haqqı.
İcbari tibbi sığorta məbləğləri belə hesablanacaq: dövlət sektoru və neft-qaz sahəsində əmək müqaviləsi əsasında çalışan şəxslərin əməkhaqqının 8000 manatdan yuxarı hissəsinin 0,5 faizi, 8000 manatadək hissəsinin 2 faizi məbləğində; özəl sektorda çalışanlar, mülki-hüquqi müqavilə əsasında işləyənlərin əməkhaqqından 8000 manatadək hissənin 1 faizi, 8000 manatdan yuxarı hissənin 0,5 faizi məbləğində.
Minimum aylıq əməkhaqqı 250 manatdır.
Neft-qaz sahəsində fəaliyyəti olmayan və qeyri-dövlət sektoruna aid edilən vergi ödəyicilərində işləyən fiziki şəxsin əməkhaqqı 8000 manatadək, məsələn, 250 manatdırsa, gəlir vergisi – tutulmur; sosial sığorta haqqı – 250 manat əməkhaqqının 200 manatlıq hissəsinə görə 3 faiz, yəni 6 manat, 200 manatdan yuxarı hissə üçün isə 10 faiz, yəni 5 manat; işsizlikdən sığorta haqqı – 250 manatın 0,5 faizi, yəni 1,25 manat; icbari tibbi sığorta haqqı – 1 faiz, yəni 2,5 manat.
Əməkhaqqı 8000 manatdan yuxarı, məsələn, 8100 manatdırsa, gəlir vergisi – 8000 manatdan yuxarı məbləğin 14 faizi; sosial sığorta haqqı – 200 manat; işsizlikdən sığorta haqqı – 40,5 manat; icbari tibbi sığorta haqqı – 80,5 manat.
Neft-qaz sahəsində fəaliyyəti olan və dövlət sektoruna aid edilən vergi ödəyicilərində işləyən fiziki şəxsin əməkhaqqı 250 manatdırsa, gəlir vergisi – 250 manatın 200 manatdan artıq hissəsi üzrə 14 faiz; sosial sığorta haqqı – 7,5 manat; işsizlikdən sığorta haqqı – 1,25 manat; icbari tibbi sığorta haqqı – 5 manat.
Əməkhaqqı 8100 manatdırsa, gəlir vergisi – 1750 manat; sosial sığorta haqqı – 243 manat; işsizlikdən sığorta haqqı – 40,5 manat; icbari tibbi sığorta haqqı – 160,5 manat.
