Fransa prezidenti Emmanuel Makron, Almaniya kansleri Angela Merkel, Rusiya prezidenti Vladimir Putin və Ukrayna prezidenti Vladimir Zelenskinin dekabrın 9-u Parisdə keçirdiyi görüş bəyannamə imzalanması ilə başa çatıb.

2014-cü ildə Rusiya Ukraynanın Krım yarımadasını işğal edərək özünə birləşdirib, Donbas bölgəsində – Donetsk və Luqansk vilayətlərinin bir hissəsində isə iki separatçı rejim qurub. Bu rejimlər özlərini müstəqil dövlət sayır. Silahlı münaqişədə 10 mindən çox adam həlak olub.

Novator.az-ın məlumatına görə, Parisdəki 9 dekabr görüşünün bəyannaməsində bölgədə atəşkəs rejiminin möhkəmləndirilməsi, ərazinin minalardan təmizlənməsi, silahlı qüvvələrin cəbhə zonasından çəkilməsi, əsir və girovların azad edilməsi niyyəti yer alır.

Bəyannaməyə əsasən, Donetsk və Luqansk vilayətlərinin bir hissəsinə xüsusi statusun verilməsi yönündə razılaşmaların həyata keçməsi sürətləndirilməli, dörd ay sonra eyni formatda yeni görüş olmalıdır.

Vladimir Putinlə Vladimir Zelenski ikitərəfli görüş də keçiriblər. Ukrayna prezidenti görüşü jurnalistlərə şərh edərkən “Hələlik heç-heçə qeydə alındı, Rusiya prezidentinin bəzi güzəştləri hiss olundu” deyib. O əlavə edib ki, razılaşma əldə etmək çətindir, ancaq dekabrın 9-da bəzi məsələlər üzrə müəyyən razılaşmalar reallaşıb”.