Şahxəndan türbəsində
Prezident İlham Əliyev və birinci xanım Mehriban Əliyeva dekabrın 6-sı Şamaxı rayonunda Şahxəndan türbəsinin ətrafında aparılan abadlıq işləri ilə tanış olublar.
AZƏRTAC xəbər verir ki, şair İmadəddin Nəsiminin qardaşı Şahi Xəndanın dəfn olunduğu Şahxəndan qəbiristanlığındakı türbənin ətrafında Heydər Əliyev Fondunun apardığı abadlaşdırma işləri zamanı böyük hissəsi torpağın altında qalan türbənin ətrafı qazılaraq torpaq başqa əraziyə daşınıb, abidədə olduğu kimi səkkizguşəli döşəmə salınıb, türbəni ziyarət edənlərin rahatlığı üçün hərtərəfli şərait yaradılıb. Türbənin ətrafında təmizlik və abadlıq işləri avstriyalı bərpaçı-memar Erik Pumerin rəhbərliyi ilə aparılıb.
Həmin gün İlham Əliyev və Mehriban Əliyeva Şamaxı rayonunda keçirilən ağacəkmə aksiyasında iştirak ediblər. Şair İmadəddin Nəsiminin 650 illik yubileyi münasibətilə ölkənin bütün ərazisini əhatə edən aksiya çərçivəsində ümumilikdə 83 şəhər və rayonda 37 növdə 650 min ağacın əkilməsi nəzərdə tutulur. Ağaclar Ekologiya və Təbii Sərvətlər Nazirliyinin tinglik təsərrüfatlarında yetişdirilib.
Şamaxı rayonunda 50 minədək ağacın əkilməsi planlanıb. Şəhərin girişindəki ərazidə keçirilən aksiyada isə 5 min ağac əkilib.
