Müdafiə naziri general-polkovnik Zakir Həsənov cəbhə zonasında yeni inşa edilən mühəndis təyinatlı hərbi obyektlərin açılışına qatılıb. Dekabrın 4-də yayılan rəsmi məlumata görə, nazir yeni istifadəyə verilən qərargah binası ilə də tanış olub. Qərargah mərkəzləşdirilmiş istilik sistemi, işıq, su, qaz və kommunikasiya xətləri ilə, inzibati və xidməti iş otaqları mebel avadanlıqları ilə təmin olunub.
Müdafiə nazirinə məruzə edilib ki, mühəndis-istehkam hərbi hissələri üçün müasir texnika alınaraq qoşunların sərəncamına verilib, hərbi əməliyyatların mühəndis təminatının yerinə yetirilməsi zamanı tətbiq olunan müxtəlif növ texnikanın saxlandığı park, şəxsi heyətin hazırlığı üçün nəzərdə tutulan taktiki sinif otaqları və digər inzibati binalar müvafiq avadanlıqlar və əyani təbliğat vasitələri ilə tam təchiz edilib.
Zakir Həsənov komandanlığa bölmələrin döyüş qabiliyyətinin artırılması və döyüş vasitələrinin effektiv istifadəsi ilə bağlı müvafiq tapşırıqlar verib, şəxsi heyətlə birlikdə nahar edib.
