Dekabrın 1-də prezident İlham Əliyev Gündüz Kərimovu Prezident Administrasiyasının qanunvericilik və hüquq siyasəti şöbəsinin müdiri təyin edib.

Gündüz Hacı oğlu Kərimov 1977-ci ildə Qazaxda anadan olub. Bakı Dövlət Universitetinin beynəlxalq hüquq və beynəlxalq münasibətlər fakültəsində və ABŞ-ın İndiana Universitetinin hüquq fakültəsində təhsil alıb.

Hüquq üzrə fəlsəfə doktorudur.

Aqrar-Sənaye Səhmdar Kommersiya Bankında baş hüquqşünas (1998-1999-cu illər), Beynəlxalq Qırmızı Xaç Komitəsində hüquq məsələləri üzrə assistent (1999-2001), Bakı Dövlət Universitetinin beynəlxalq hüquq fakültəsində müəllim (2002-2011), dekan müavini (2011-2014) işləyib.

2014-cü ildən Bakı Dövlət Universitetinin Dəniz və Enerji Hüququ Mərkəzinin rəhbəri, həmçinin universitetin mülki proses və kommersiya hüququ kafedrasının müəllimidir.

2017-ci ilin noyabrından Azərbaycanın birinci vitse-prezidentinin köməkçisi olub.

2019-cu il noyabrın 29-da dövlət başçısı İlham Əliyev Prezident Administrasiyasının strukturunu dəyişib. Həmin gün dövlət başçısı administrasiyanın bir çox şöbəsinə müdir təyin etsə də, qanunvericilik və hüquq siyasəti şöbəsinin müdiri postuna təyinat olmamışdı.