Müsavat seçki müzakirəsi təşkil edir
Müsavat Partiyası siyasətçi və ictimai xadimləri dəyirmi masa ətrafında toplayır. Novator.az-ın məlumatına görə, dekabrın 3-ü Müsavatın Bakıdakı mərkəzi qərargahında keçiriləcək tədbirə bu partiyanın başqanı Arif Hacılının, AXCP sədri, Demokratik Qüvvələrin Milli Şurasının Koordinasiya Mərkəzinin üzvü Əli Kərimlinin, Xalq Partiyasının sədri Pənah Hüseynin, Haqq-Ədalət Partiyasının təşkilat komitəsinin sədri Əli İnsanovun, Milli Strateji Düşüncə Mərkəzinin sədri, Müsavat Məclisinin üzvü İsa Qəmbərin, bir neçə başqa siyasi və ictimai təşkilatın nümayəndələrinin, jurnalist, politoloq və hüquqşünasların qatılacağı gözlənir.
Dəyirmi masada mümkün növbədənkənar parlament seçkisi müzakirə olunacaq.
Dekabrın 2-də Milli Məclis parlamentin buraxılması, növbədənkənar seçkinin təyin olunması üçün dövlət başçısına müraciət edib.
Təşəbbüsün müəllifi prezident İlham Əliyevin sədrlik etdiyi, parlamentdə 68 deputatla təmsil olunan Yeni Azərbaycan Partiyasıdır.
Azərbaycanda sonuncu parlament seçkisi 2015-ci il noyabrın 1-də keçirilib. Milli Məclisin buraxılması gündəmə gəlməsəydi, növbəti seçki 2020-ci il noyabrın 1-də olacaqdı.
2016-cı ildə konstitusiyaya əlavə olunmuş 98-1-ci maddəyə görə, Azərbaycan prezidenti Milli Məclisi buraxa bilər.
Milli Məclisə seçkinin təyin edilməsi prezidentin səlahiyyətindədir. Seçki haqqında qərar səsvermə gününə azı 60 gün qalmış rəsmi dərc edilməlidir.
