Dilarə Bağır qızı Seyidzadəyə prezidentin fərdi təqaüdü kəsilib. Sərəncamı dövlət başçısı İlham Əliyev dekabrın 2-də imzalayıb və bunu Dilarə Seyidzadənin dövlət qulluğunda göstərdiyi xidmətlərlə əsaslandırıb.
Prezidentin fərdi təqaüdünün aylıq məbləği 1450 manatdır.
Novator.az bildirir ki, 1939-cu il oktyabrın 25-i Bakıda doğulan Dilarə Seyidzadə indiki Bakı Dövlət Universitetini bitirib. Elmlər Akademiyasının Tarix İnstitutunda baş laborant, kiçik elmi işçi, baş elmi işçi, aparıcı elmi işçi, Azərbaycan Dövlət Konservatoriyasında baş müəllim olub.
Prezidentin İcra Aparatında böyük məsləhətçi, prezidentin köməkçisi, Prezident Katibliyi rəisinin müavini-prezidentin köməkçisi vəzifələrində çalışıb.
16 noyabr 1999-cu ildən 29 noyabr 2019-cu ilə qədər Prezident Katibliyinin rəisi olub.
“Şöhrət” və “Şərəf” ordenləri laureatıdır.
