Rüfət Tofiq oğlu Məmmədov Nazirlər Kabineti Aparatının rəhbəri təyin olunub.
Novator.az bildirir ki, 1981-ci il təvəllüdlü Rüfət Məmmədov Bakı Dövlət Universitetini beynəlxalq hüquq ixtisası ilə, Almaniyanın Drezden Texniki Universitetini Avropa inteqrasiya hüququ üzrə bitirib.
Əmək fəaliyyətinə 2002-ci ildə başlayıb, yerli və xarici şirkətlərdə hüquq sahəsində çalışıb.
Avropa İttifaqı ilə Azərbaycan arasında tərəfdaşlıq və əməkdaşlıq sazişinin həyata keçirilməsinə dəstək layihəsində hüquq məsləhətçisi, Avropa İttifaqının Azərbaycana Beynəlxalq Texniki Yardımı üzrə Koordinasiya Bürosunun icraçı direktoru olub.
Azərbaycanda İxracın və İnvestisiyaların Təşviqi Fondunda (AZPROMO) vitse-prezident, prezident postlarını tutub.
2018-ci il mayın 31-dən iqtisadiyyat nazirinin müavini idi.
Əsasnaməsinə görə, Nazirlər Kabinetinin Aparatı ali kateqoriyalı dövlət orqanıdır. Aparat Prezident Administrasiyası və mərkəzi icra hakimiyyəti orqanları ilə qarşılıqlı əlaqəli surətdə fəaliyyət göstərir, bilavasitə baş nazirə və onun müavinlərinə tabedir, onun rəhbərini baş nazir prezidentlə razılaşdırıb təyin edir.
